Sach kehte hain log, ghar ki Lakshmi hun main,
Pita ki laadli, maa ki saheli hun main.
Kabhi maa ki kokh mein ghuti, kabhi janane ke baad mitti mein mili hun main,
Kabhi chote ki dekh rekh mein, kabhi bade ki zaroorat ke
liye shiksha se vanchit rahi hun main,
Sach kehte hain log, ghar ki Lakshmi hun main.
Kabhi chote kapdon ke kaaran, kabhi sirf aurat hone se haivanon ka shikaar hui hun,
Auron ko chchodo apne swajanon ke bistar tak pe sajai gayi hun
main,
Sach kehte hain log, ghar ki Lakshmi hun main.
Kabhi pita ke rinn ke liye tehseeldaar se byaahi gayi,
Jo kabhi kisi se prem kar baithi toh bhai ki shaan ke khatir
tukde hui hun main
Sach kehte hain log, ghar ki Lakshmi hun main.
Kabhi pati ki mardaangi ka saboot, kabhi uski maut ke shoke pe agni bhent chadhi hun main,
Kabhi beta janane ke liye satayi gayi, kabhi sirf T.V fridge
ke liye jali hun main,
Sach kehte hain log, ghar ki Lakshmi hun main.
Jo vidhva hui toh ekaant ka jeevan, jo fir mehendi racha li toh vaishya kehlayi gayi hun main,
Yugon se sone chandi ki tarah istemaal hi toh hui hun main,
Sach kehte hain log, ghar ki Lakshmi hun main,
Pita ki laadli, maa ki saheli hun main.
